“Seguimos o ritmo cos pés no concerto que deron no Pump Room os Calefax, cinco xeniais tipos holandeses que fixeron que o quinteto de vento nos parecera o mellor formato musical do planeta”.

The Times

O quinteto de vento holandés Calefax Reed Quintet é coñecido polas súas interpretacións virtuosistas e orixinais e polos innovadores programas e concertos espectaculares. Tocan sempre de pé e gustan de interactuar co público, presentándose eles mesmos ou comentando o programa. Ademais os cinco músicos arranxan, recompoñen e interpretan pezas que abranguen oito séculos, desde a música antiga, o Renacemento, o Barroco e o Romanticismo ata o jazz ou estreas mundiais.

O Calefax Reed Quintet posúe o Premio Philip Morris das Artes (1997), o Kersjes van de Groenekan (2001) e o VSCD Classical Music Award de 2005 como mellor interpretación de cámara nos teatros holandeses na temporada 2004/2005. Nos últimos anos colaborou con artistas como o Zapp String Quartet, o pianista Ivo Janssen e a mezzosoprano Cora Burggraaf. Tamén con cantantes e músicos no ámbito do jazz.

A firma discográfica Alemán MDG edita a súa crecente discografía, que xa recibiu reaccións entusiastas da crítica e da prensa especializada internacional.

Ademais de ofrecer concertos na súa Holanda natal, actúa frecuentemente por toda Europa: Reino Unido, Suecia, Rusia, Estonia ou Italia e tamén en países como China ou Xapón, onde realizou a segunda serie de actuacións en novembro de 2009.