Alla Francesca foi fundado pola soprano Brigitte Lesne e o frautista Pierre Hamon en 1989, cando ambos os dous formaban parte do Ensemble Gilles Binchois. O grupo está especializado en cancións e danzas instrumentais da Idade Media e do Renacemento, cun amplo repertorio que inclúe cancións de trobadores, obras de compositores como Machaut ou Dufay e unha gran variedade de obras do repertorio medieval español e italiano.
Alla Francesca ten a súa base no Centro de Estudos Medievais de París. O número de intérpretes varía desde o trío ata o octeto, segundo o programa, e sempre facendo énfase tanto na parte instrumental (frautas, violíns, arpas, laúdes, percusións) como no estilo vocal axeitado a cada peza e na interpretación de textos poéticos.
No seu continuo labor de investigación, afronta novos retos interpretativos e experimenta con diversas combinacións que fan que a miúdo incorpore aos seus programas a tradición musical clásica e popular de países de Asia, do Norte de áfrica ou do Oriente Próximo. Neste traballo colabora tamén con luthieres e consulta gran cantidade de estudos e tratados musicais.
Alla Francesca ofrece recitais de xeito regular en Francia, pero tamén por toda Europa e no resto do mundo, en países como Australia, Brasil ou Nova Zelanda. Editou varios CD en Opus 111 e Virgin Veritas. Entre os numerosos premios que recibiu destaca o prestixioso Diapason d’Or do ano 2000, concedido ao seu oitavo CD e que o recoñecía como a mellor gravación do ano.